Byssa lulla leia

SESILIE REISTAD (1866-1958)

var fødd på Helgatoni i Samnanger. I ulike kjelder finn ein namnet hennar både som Sesilie, Cecilie, Ceselie og Seselia. Ho flytta seinare til Gjerde, «Nikkeneset» og Reistad. Foreldra hennar var Helge Nilsen Gjerde (1836-1931) frå Kvittingen i Samnanger og Margreta Olsdotter Gjerde (1834-1911) frå Langhelle i Vaksdal. Sesilie vart i 1890 gift med Torgils Johan Nilsen Reistad (1866-1956) frå Samnanger. Han var målarsvenn i Minnesota frå 1906-1908. I folketeljinga for 1910 budde Sesilie og Torgils på Reistad (Framnes) og hadde 7 born. Han arbeidde då som målar.

Arne Bjørndal gjorde opptak med Sesilie Reistad i Samnanger i juli 1954. Ho song då inn fleire religiøse folketonar, ei gjetarvise og nokre barnevers. Desse er i dag arkivert ved Arne Bjørdals samling i Bergen.

«Byssa lulla leia» er eit barnevers som finst i mange variantar. Melodien finst i folketradisjonen med mange ulike tekstar, mellom anna «Skjære, skjære havre», «Bro, bro brille» og «Ro, ro til fiskeskjær». Den er også brukt av kjente forfattarar, til dømes til «Bekken går i enge» («Renlighed») av Henrik Wergeland (Wergeland, 1850) og «Kveld-sang for Blakken»/ «Fola, fola Blakken» frå Nordahl Rolfsens lesebok (Rolfsen, 1906). Også her i Barnesongboka finn me denne melodien i fleire variantar, til dømes til «Ro, ro te Baltaskjer» etter Anna Utne frå Sund, «Ro, ro på fjord`n» etter Jenny Mathilde Olsnes frå Fedje, «Ro, ro te Siraland» etter Ingeborg Mjanger frå Masfjorden og «Ro, ro Ralte» etter Mariann Andresen frå Austevoll.